Merkezi Aziýa döwletleriniň ilçileri Hytaý bilen hyzmatdaşlygy ara alyp maslahatlaşdylar

Hytaý täze ýylynyň öňüsyrasynda Merkezi Aziýa döwletleriniň ilçileri HHR-nyň daşary işler ministriniň orunbasary Sun Weýdun bilen bolan duşuşygynda 2023-nji ýylyň domanynda gazanylan ikitaraplaýyn we köptaraplaýyn hyzmatdaşlygyň netijelerine garadylar we  2024-nji ýylda onuň esasy ugurlaryny ara alyp maslahatlaşdylar.

Taraplar geçen ýylyň uly wakalara beslenendigini we onuň dowamynda Merkezi Aziýa döwletleriniň baştutanlarynyň  Hytaý Halk Respublikasyna döwlet saparlarynyň amala aşyrylandygyny, Merkezi Aziýa-Hytaý Formatynyň Sian şäherindäki sammitine hem-de Pekin şäherindäki Halkara hyzmatdaşlyk boýunça 3-nji Guşak we Ýol Forumyna gatnaşandyklaryny nygtadylar. Döredilen hyzmatdaşlyk mehanizmleriniň çäklerinde gazanylan ylalaşyklarynyň hem-de ylalaşylan birnäçe durmuş-ykdysady taslamalaryň amala aşyrylmagynyň taraplaryň bähbitlerine gabat geljekdigini bellediler.

Nusgawy akyldar we şahyr Magtymguly Pyragynyň 300 ýyllygy mynasybetli “Pähim-paýhas ummany – Magtymguly Pyragy” sygry bilen bellenilýän şu ýylyň dowamynda Türkmenistan we Hytaý hemmetaraplaýyň strategiki hyzmatdaşlar hökmünde mundan beýläk hem ikitaraplaýyn hyzmatdaşlygyny berkitjekdigi barada ylalaşdylar.